कोभिड-१९ का बिरामीको उपचार हुने अस्पताल पूर्णरूपमा साेही प्रयाेजनका लागि प्रयोग गरिने
<p>काठमाडौं। स्वास्थ्य तथा जनसंख्यामन्त्री भानुभक्त ढकालले जुन अस्पतालमा कोभिड-१९ का बिरामीको उपचार हुन्छ, त्यो अस्पताल पूर्णरूपमा कोभिड-१९ कै उपचारका लागि प्रयोग गरिने बताएका छन्।</p>
<p>कोभिड-१९ उपचारको तयारीबारे विभिन्न ६ वटा अस्पतालको अनुगमन गरेर फर्किएको टोलीसँग आज मन्त्रालयमा जानकारी लिने क्रममा मन्त्री ढकालले सो कुरा बताएका हुन्।</p>
<p>मन्त्री ढकालले टेकु, पाटन र सशस्त्र प्रहरीको अस्पताल पूर्णरूपमा कोभिड-१९ का लागि उपचार शुरू गराउने र ती अस्पताल भरिएपछि मात्र अन्य अस्पतालमा उपचार गराउने बताए।</p>
<p>उनले सबै मिलेर काम गर्दा मात्र सफलता प्राप्त गर्न सकिने भन्दै कोरोना भाइरसविरुद्धको लडाइँमा पनि सामूहिकरूपमै काम गर्नुपर्ने बताए। “एक व्यक्तिले भन्दा सामूहिकरूपमा काम गर्दा राम्रो हुन्छ र त्यो सफल पनि हुन्छ”, उनले भने।</p>
<p>मन्त्री ढकालले स्वास्थ्यकर्मी र चिकित्सकलाई स्वास्थ्य सामग्रीको अभाव हुन नदिने बताउँदै उच्च मनोबलका साथ काम गराउन विभिन्न काउन्सिलका पदाधिकारीलाई निर्देशन पनि दिए।</p>
<p>काेभिड-१९ काे उपचारका लागि तयार गरिएका अस्पतालहरूको तयारीबारे अनुगमन टोलीका तर्फबाट नेपाल मेडिकल काउन्सिलका रजिष्ट्रार कृष्ण अधिकारीले अस्पतालहरूको अवस्थाबारे जानकारी दिए। </p>
<p>टोलीले कोभिड-१९ उपचारको तयारीबारे त्रिवि शिक्षण अस्पताल, पाटन अस्पताल, वीर अस्पताल, ट्रमा सेन्टर, सिभिल अस्पताल, केएमसी अस्पतालको अनुगमनका गरेको थियो।</p>
प्रतिक्रिया दिनुहोस्
.jpg)
