विश्वको आधा जनसंख्या लकडाउनमा
<p>काठमाडौं। विश्‍वको आधा जनसंख्या अर्थात् तीन अर्ब ९० करोड मानिस यतिबेला कोरोना भाइरसको संक्रमण (कोभिड-१९) बाट बच्‍न लकडाउनमा छ।</p>
<p>समाचार एजेन्सीहरूका अनुसार ९० वटा मुलुकले कोभिड-१९ विरुद्ध लड्न कुनै न कुनै रूपमा निषेधाज्ञा जारी गरेका छन्। ती मुलुकका नागरिकलाई घरमै बस्‍न सरकारहरूले निर्देशन दिएका छन्।</p>
<p>आफ्ना नागरिकलाई कोभिड-१९ को महामारीबाट बचाउने सरकारहरूको प्रयत्न हो त्यो।</p>
<p>समाचार एजेन्सी एएफपीको डाटाबेसअनुसार ९० मध्ये कतिपय मुलुकमा कर्फ्यु नै जारी गरिएको छ। कतिपय मुलुकले अनिवार्य तथा कतिपयले क्‍वारेन्टाइन र एकान्तवासका रूपमा नागरिकलाई घरभित्रै बस्‍न अह्राएका छन्।</p>
<p>पर्यटकीय मुलुक थाइल्यान्डले गत शुक्रबारयता देशभर कर्फ्यु आदेश जारी गरेको छ। स्पेन, इटाली, अमेरिकालगायत मुलुकमा कोभिड-१९ का मृतकको संख्या निरन्तर बढ्दो क्रममा छ।</p>
<p>स्पेनका नागरिकलाई थप १० दिन घरबाट बाहिर ननिस्कन सरकारले निर्देशन दिएको छ।</p>
<p>लकडाउन लम्बिँदै जाँदा संसारभर बेरोजगारी दर पनि ह्वात्तै बढेको छ। ‘युरोन्युज स्पेनिस सर्भिस’को रिपोर्टअनुसार स्पेनमा मात्र मार्च महिनामा बेरोजगार जनसंख्या तीन लाख नाघेको छ।</p>
<p>यसबाट अर्थतन्त्रमा सन् २००८ को विश्‍वव्यापी मन्दीभन्दा गम्भीर असर देखापर्ने स्पेनका सञ्‍चारमाध्यमले बताएका छन्।</p>
<p>महामारीका कारण सिर्जित बेरोजगारी समस्या समाधानका लागि युरोपियन युनियनले एक सय बिलियन युरो खर्चिने गरी ‘एसयूआरई’ नाम दिएर नयाँ कार्यक्रम घोषणा गरेको छ। २७ वटा सदस्य राष्ट्रलाई ऋणमार्फत सहायता गर्ने युरोपियन युनियनको योजना छ।</p>
प्रतिक्रिया दिनुहोस्
.jpg)
