उपनिर्वाचनका लागि तयारी तीव्र
<p>काठमाडाैं। निर्वाचन आयोगले आगामी १४ मंसीरमा प्रतिनिधिसभा सदस्यसहित कूल ५२ पदमा निर्वाचन गर्ने गरी आवश्यक तयारी गरेको छ।</p>
<p>आयोगले आज एक प्रेस विज्ञप्तिमार्फत् मतदानको आवश्यक तयारी भइरहेको र व्यवस्थापनको काम भइरहेको जनाएको छ।</p>
<p>आयोगका अनुसार प्रतिनिधिसभा सदस्यतर्फ एक, प्रदेशसभातर्फ तीन, स्थानीय तहका प्रमुख, अध्यक्ष, उपाध्यक्ष र वडा अध्यक्ष गरी कूल ४८ गरी ५२ रिक्त पदमा उपनिर्वाचन हुने जनाएको छ।</p>
<p>प्रतिनिधिसभा सदस्यतर्फ कास्की क्षेत्र २ र प्रदेशसभातर्फ भक्तपुर जिल्लाको प्रतिनिधिसभा निर्वाचन क्षेत्र १ को प्रदेशसभा क्षेत्र १, बाग्लुङको प्रतिनिधिसभा निर्वाचन क्षेत्र २ को प्रदेशसभा निर्वाचन क्षेत्र २ र दाङ जिल्लाको प्रतिनिधिसभा क्षेत्र ३ को प्रदेशसभा निर्वाचन क्षेत्र २ मा आगामी १४ मंसीरमा हुने निर्वाचनका लागि २१ कात्तिकमा उम्मेदवारको मनोनयन दर्ता हुने जनाएको छ।</p>
<p>आयोगले आज प्रकाशित गरेको तालिकाअनुसार २२ कात्तिकमा उम्मेदवारको विरोधमा उजुरी दिने, २३ मा मनोनयन र उजुरीमाथि जाँचबुझ गर्ने, २४ मा उम्मेदवारको नाम फिर्ता लिने र सोही दिन उम्मेदवारको अन्तिम नामावली प्रकाशन गर्ने, २५ मा निर्वाचन चिह्न प्रदान गर्ने र १४ मंसीरमा मतदान हुनेछ।</p>
<p>यस्तै स्थानीय तहतर्फ निर्वाचन हुने कूल ४८ पदका लागि यही २७ कात्तिकमा मनोनयनपत्र दर्ता गराउने र सोही दिन उम्मेदवारको नामावली प्रकाशन गर्ने आयोगले जनाएको छ।</p>
<p>यस्तै, २८ मा उम्मेदवारको विरोधमा उजुरी दिने, २९ मा उम्मेदवारको अन्तिम नामावली प्रकाशन गर्ने र आगामी १ मंसीरमा निर्वाचन चिह्न प्रदान गर्ने कार्यक्रम तय गरेको छ।</p>
<p>स्वीकृत भएको निर्वाचन कार्यक्रम नेपाल राजपत्रमा प्रकाशनका लागि पठाइसकिएको आयोगले जनाएको छ। <em><strong>रासस</strong></em></p>
प्रतिक्रिया दिनुहोस्
.jpg)
