देव गुरुङले भने– तत्काल सभामुखको निर्वाचन सम्भव छैन
<p>काठमाडौं। सत्तारुढ दल नेपाल कम्युनिष्ट पार्टी (नेकपा)का प्रमुख सचेतक देव गुरुङले तत्काल सभामुखको निर्वाचन सम्भव नभएको बताएका छन्।</p>
<p>काठमाडौंमा भएको एक कार्यक्रममा गुरुङले सर्वोच्च अदालतमा मुद्दा विचाराधीन रहेकाले तत्काल सभामुखको निर्वाचन हुने अवस्था नरहेको बताएका हुन्।</p>
<p>“एउटै दलको सभामुख र उपसभामुख हुन नपाउने भन्दै सर्वाेच्च अदालतमा दायर गरिएको मुद्दा विचाराधीन रहेकाले सभामुखको निर्वाचनबारे टिकाटिप्पणी गर्न मिल्दैन,” गुरुङले भने।</p>
<p>सभामुख र उपसभामुख दुवै पद खाली भए दलहरूबीच सहमतिको आधारमा उम्मेदवार तय गरेर निर्वाचन गर्न सकिने प्रमुख सचेतक गुरुङको भनाइ छ।</p>
<p>“संविधानले सभामुख र उपसभामुख दुई पद फरक–फरक दलको हुनुपर्ने व्यवस्था गरेको छ,” गुरुङले भने, “यस्तो अवस्थामा दुवै पद खाली नभई सभामुखको निर्वाचन गर्न मिल्दैन।”</p>
<p>यौन दूराचारको आरोप लागेपछि कृष्णबहादुर महराले सभामुख पदबाट राजीनामा दिएका छन्।</p>
<p>सोही पदका लागि निर्वाचन गर्न सर्वोच्च अदालतमा विचाराधीन मुद्दाले असहज बनाएको प्रमुख सचेतक गुरुङको भनाइ छ।</p>
<p>प्रमुख सचेतक गुरुङले सभामुखको निर्वाचन गर्ने अवस्थानै नभएका बेला त्यसमा व्यक्तिले दाबी गर्नुको कुनै औचित्य नरहेको पनि बताएका छन्।</p>
प्रतिक्रिया दिनुहोस्
.jpg)
