अध्यक्ष दाहालसँग दूरी बढेको छैनः प्रधानमन्त्री ओली
<p>काठमाडाैं। प्रधानमन्त्री एवं नेपाल कम्युनिष्ट पार्टी (नेकपा) का अध्यक्ष केपी शर्मा ओलीले पार्टीका अर्का अध्यक्ष पुष्पकमल दाहालसँग कुनै प्रकारको दूरी नबढेको र बढ्ने अवस्थासमेत नरहेको जनाएका छन्।</p>
<p>असंलग्न आन्दोलन(नाम)को अजरबैजानको बाकुमा सम्पन्न १८औंँ शिखर सम्मेलनमा नेपाली प्रतिनिधि मण्डलको नेतृत्व गरी आज स्वदेश फर्केपछि आयोजित पत्रकार भेटघाटमा अध्यक्ष दाहालसँग दूरी बढेको हो भन्ने सञ्चारकर्मीको प्रश्नमा प्रधानमन्त्री ओलीले उक्त जवाफ दिएका हुन्।</p>
<p>“उहाँ काठमाडौंमा र म बाकुमा हुँदा दूरी त बढ्ने नै भयो। किनकी दूरी नै टाढा छ। त्योभन्दा अरु टाढा केही पनि छैन। दूरी बढ्ने स्थिति र सम्भावना पनि छैन,” उनले भने।</p>
<p>जननेता मदनकुमार भण्डारीकै कित्तामा विगतमा आफू रहेको भन्ने अध्यक्ष दाहालको पछिल्लो अभिव्यक्तिबारे सोधिएको प्रश्नमा प्रधानमन्त्री ओलीको जवाफ थियो, “उहाँले कुन प्रसङ्गमा भन्नुभएको हो त्यो थाहा भएन तर जननेता भण्डारीको विचारका आधारमा पार्टीलाई समयानुकूलरूपमा अघि बढाउँछु भन्नुभएको हो। भण्डारीसँग पनि जोड्ने अनि हाम्रो दूरी बढेको कुरा पनि गर्ने, यो कुन गणितले काम गर्छ मलाई थाहा भएन। गणित मिलेन। हाम्रो दूरी बढेको छैन।”</p>
प्रतिक्रिया दिनुहोस्
.jpg)
