प्रतिपक्षी दलको विरोधकाबीच सुदूरपश्चिम सभामा बजेटको छलफल शुरू
<p>कैलाली। सुदूरपश्चिम प्रदेश सरकारले १ असारमा ल्याएको अगामी आर्थिक वर्षको बजेटमाथिको छलफल प्रस्ताव २० दिनपछि प्रदेश सभामा टेबुल भएको छ।</p>
<p>प्रमुख प्रतिपक्षी दल नेपाली कांग्रेस र प्रतिपक्षी दल जसपाले नाराबाजी गर्दै प्रदेश सभाको बैठक अवरोध सिर्जना गरेपनि सभामुखले बैठकको कारवाही अगाडी बढाएका हुन्।</p>
<p>सभामुख अर्जुनबहादुर थापाले आजको बैठकमा सुदूरपश्चिम खेलकूदसम्बन्धी विधेयक २०७६, सुदूरपश्चिम प्रज्ञा प्रतिष्ठानका सम्बन्धमा व्यवस्था गर्न बनेको विधेयक २०७६ र स्थानीय तहका पदाधिकारीको सुविधासम्बन्धी ऐन २०७५ लाई संशोधन गर्न बनेको विधेयक प्रमाणीकरण भएको जानकारी गराएका थिए।</p>
<p>लगत्तै सभामुख थापाले अर्थमन्त्री झपटबहादुर बोहोरालाई आर्थिक वर्ष २०७७/०७८ को बजेटमाथि सभामा छलफल गरी पारित गरिपाउँ भन्ने प्रस्ताव टेबुल गर्न अनुमती दिए। </p>
<p>प्रतिपक्षी दलले सरकार विरुद्ध नाराबाजी गरिरहेकै बेला अर्थमन्त्री बोहोराले छलफल प्रस्ताव सभामा टेबुल गरेका थिए।</p>
<p>प्रस्ताव टेबुल भएपछि सभामुख थापाले प्रदेश सभाको अर्को बैठक २२ असारदेखि दिउँसो ३ बजेका लागि बोलाएका छन्।</p>
<p>प्रतिपक्षी दलले कोरोना भाइरस संक्रमणको नियन्त्रण तथा रोकथाममा सरकारले प्रभावकारी काम गर्न नसकेको भन्दै अवरोध सिर्जना गर्दै आएको छ।</p>
प्रतिक्रिया दिनुहोस्
.jpg)
