Politics

गृहपृष्ठ

चुनाव हारेका, चुनाव नलडेका र पटकपटक मन्त्री भएकालाई सरकारमा सामेल गर्नुहुन्‍न: नेकपा नेता थापा काठमाडौं। नेपाल कम्युनिष्ट पार्टी (नेकपा)का नेता कर्णबहादुर थापाले निर्वाचनमा पराजित भएका, निर्वाचनमा भाग नलिएका र पटक-पटक मन्त्री भइसकेकालाई सरकारमा समावेश नगर्न पार्टी अध्यक्ष एवम् प्रधानमन्त्री केपी शर्मा ओलीलाई सुझाव दिएका छन्। लामो समयदेखि चल्दै आएको नेकपाको आन्तरिक विवाद समाधान भएसँगै पार्टी नेतृत्व मन्त्रिपरिषद् पुर्नगठनको तयारीमा जुटेको छ। मन्त्रिपरिषद् पुर्नगठनकै विषयमा अध्यक्ष प्रधानमन्त्री ओली र पुश्पकमल दाहालबीच बारम्बार छलफल भइरहेको छ।  नेतृत्व मन्त्रिपरिषद् पुर्नगठनको तयारीमा रहेका बेला आफू पनि सरकारमा सामेल हुने चर्चा चलेको भन्दै नेकपा सुदूर पश्चिम प्रदेशका अध्यक्ष थापाले सामाजिक सञ्जाल फेसबुकमार्फत यस्तो सल्लाह दिएका हुन्। प्रधानमन्त्री ओलीले २०७२ सालमा पहिलो पटक सरकारको नेतृत्व गर्दा केही समयका लागि थापालाई उद्योग मन्त्रालयको जिम्मेवारी दिएका थिए। “मैले प्रतिनिधिसभाको यो अवधिभरी मन्त्री बन्ने कुनै इच्छा राखेको छैन। यस अवधिमा म पार्टीको काममै लाग्नेछु। निर्वाचनमा पराजित भएका वा निर्वाचन नै नलडेका कसैलाई पनि मन्त्री बनाउनु हुँदैन र व्यक्ति स्वयमले पनि त्यस्तो इच्छा राखेर प्रधानमन्त्रीलाई असजिलो बनाउनु हुँदैन भन्ने मेरो द&zwj;ृड मान्यता छ,” थापाले लेखेका छन्, “पटक पटक मन्त्री भइसकेकाहरुलाई पनि मन्त्री नबनाउँदा राम्रो हुन्छ। पद र सत्ताका लागि जे पनि गर्न तयार हुनुले मुल्यको राजनीतिमा प्रश्न उठेको सन्दर्भलाई सबैले महशुष गरौं। लोभ त्यागौं, मुल्यको राजनीतिको रक्षा गरौं।” असोज १ मा सरकारको सिफारिसमा राष्ट्रपतिबाट राष्ट्रिय सभामा मनोनित भएका नेकपाका उपाध्यक्ष बामदेव गौतमलाई मन्त्री बनाउने विषय पार्टीभित्र पेचिलो बन्दै गएको अवस्थामा नेता थापाले यस्तो भनाइ सार्वजनिक गरेका हुन्। गौतमले अर्थमन्त्री बन्ने तिब्र इच्छा देखाइरहेका छन् भने निर्वाचन हारेको व्यक्तिलाई सरकारमा समावेश गर्न प्रधानमन्त्री ओली हिच्किचाइरहेको बताइएको छ।  गौतमले आफूलाई मन्त्री बनाउन सचिवालयका सबै सदस्यहरु सकारात्मक भए पनि प्रधानमन्त्रीले नमानेको गुनासो गरेको उनीनिकट नेताहरुले बताउँदै आएका छन्। जबकि कानुन व्यावसायी समेत रहिसकेका सचिवालय सदस्य एवम् संसदीय दलका उपनेता सुभाषचन्द्र नेम्वाङले संविधानत चुनाव हारेको व्यक्तिलाई मन्त्री बनाउन नमिल्ने सार्वजनिक रूपमा बोल्दै आएका छन्।  यसैबीच सर्वोच्च अदालतले पनि गौतमलाई राष्ट्रिय सभा सदस्यका रुपमा थप जिम्मेवारी नदिन आदेश जारी गरेर तत्कालका लागि उनको मन्त्री बन्ने बाटोमा तगारो हालेको छ। यस मुद्धामा सर्वोच्चले भोली निर्णय दिने अपेक्षा गरिएको छ।