भूकम्प स्मृति उद्यानले अन्तर्राष्ट्रिय महत्त्व राख्छ : सभामुख
<p>सिन्धुपाल्चाेक। सभामुख अग्निप्रसाद सापकोटाले भूकम्पबाट सबैभन्दा बढी क्षति ब्यहोरेको सिन्धुपाल्चोकमा निर्माण गरिने भूकम्प स्मृति उद्यानको काम यथाशीघ्र अघि बढाउन पहल गर्ने बताएका छन्। </p>
<p>बिहीबार सदरमुकाम चौतारामा भएको राष्ट्रिय पुनःनिर्माण प्राधिकरणअन्तर्गत निर्माणको चरणमा रहेको भूकम्प स्मारक उद्यान समन्वय तथा सहजीकरणका लागि भएको बैठकमा उनले सो कुरा बताएका हुन्।</p>
<p>उक्त स्मृति उद्यानका संरक्षकसमेत रहेका सभामुख सापकोटाले राष्ट्रिय गौरवको आयोजना स्मृति उद्यान बनाउन कानूनी जटिलता हटाएर पूरा गरी छाड्ने प्रतिबद्वता जनाए।</p>
<p>“यो राष्ट्रिय गौरवको आयोजना हो, यसले अन्तर्राष्ट्रिय महत्व राख्छ”, सभामुख सापकोटाले भने, “यसकारण बैठकमा मेरो उपस्थिति आफैँमा अर्थपूर्ण छ।”</p>
<p>समस्या निराकरणका लागि जोखिम आवश्यकता परे पनि दिन आफू तयार भएरै आएको उनले बताए। राम्रो काम गर्नका लागि कानुनी जटिलतामात्रै प्रधान नरहेको उनको जिकिर थियो।</p>
<p>देशकै स्मरणयोग्य बनाउनका लागि केही क्षति भए पनि ब्यहोर्न तयार हुनुपर्नेमा उनले जोड दिए। </p>
<p>स्मृति उद्यानको तत्कालीन वन तथा भूसंरक्षणमन्त्री अग्निप्रसाद सापकोटा र सांसद शेरबहादुर तामाङद्वारा २०७३ वैशाख २९ गते शिलान्यास गरिएको थियो।</p>
<p>चौतारा साँगाचोकगढी नगरपालिका वडा नं ५ दारेगौँडा पानी ट्याङ्कीमा भगवती सामुदायिक वन क्षेत्रको ४२ हजार १०८ वर्गमिटर क्षेत्रमा बन्ने गरी शिलान्यास भएको हो।</p>
<p>निर्माण समन्वय र सहजीकरण समिति गठनसमेत भएर निर्माण सुरु भएको भनिएको उद्यान पाँच वर्ष बितिसक्दासमेत योजनामै थन्किएको छ।</p>
<p>४९ करोड ९३ लाख १६ हजार ५२४ रूपैयाँको लागत अनुमान र उद्यानको डीपीआरसमेत सम्पन्न गरी पुनःनिर्माण प्राधिकरणबाट एक करोड रूपैयाँ स्वीकृत भई घेराबार लगाइएको थियो। <em>रासस</em></p>
प्रतिक्रिया दिनुहोस्
.jpg)
