प्रतिबन्धपछि ‘छिन्नभिन्न’ नेत्रविक्रम चन्द समूह
<p>काठमाडौं। सरकारले २८ फागुन २०७५ मा गतिविधिमा प्रतिबन्ध लगाउँदै धमाधम पक्राउ गर्न थालेपछि नेत्रविक्रम चन्द समूहको नेपाल कम्युनिष्ट पार्टीका अधिकांश नेता–कार्यकर्ता भूमिगत छन्।</p>
<p>प्रहरीको तथ्यांकअनुसार प्रतिबन्धको आठ महीनामा केन्द्रदेखि जिल्लास्तरीय पदाधिकारी तहका ७२ सहित एक हजार १५० नेता–कार्यकर्ता समातिइसकेका छन्।</p>
<p>यस बीचमा दलित मुक्ति मोर्चाका केन्द्रीय अध्यक्ष डम्बर विक, युवा संगठन केन्द्रीय अध्यक्ष बबिल केसी, नेपाल महिला संघ (क्रान्तिकारी) की महासचिव धीरेन्द्रा उपाध्यायलगायतका केन्द्रीय सदस्य पक्राउ परेका छन्। </p>
<p>सरकारले पक्राउ गर्न थालेपछि चन्द समूहका कतिपय नेता–कार्यकर्ता अर्को राजनीतिक दलमा प्रवेश गरिरहेका छन्।</p>
<p>१९ जेठ २०७६ मा पोलिटब्यूरो सदस्य तथा पूर्वराज्यमन्त्री पदम राई सत्तारुढ नेकपामा प्रवेश गरेका छन्। प्रतिबन्धपछि ५९६ जनाले पार्टी छाडेको प्रहरीको तथ्यांकमा छ। </p>
<p>सुरक्षा स्रोतका अनुसार महासचिव चन्दसहित ५१९ जनाको नाम प्रहरीले फरार सूचीमा राखेको छ।</p>
<p>हिंसात्मक गतिविधिमा लागेको आरोपमा चन्द समूहका नेता–कार्यकर्ताविरुद्ध देशभरका अदालतमा एक हजार ८८ वटा मुद्दा दर्ता छन्।</p>
<p>पक्राउ परेकामध्ये ६१ जना सोधपुछपछि छुटेको प्रहरी प्रधान कार्यालयले जनाएको छ। ८३४ जनालाई अदालतले धरौटी र साधारण तारेखमा छाडेको छ।</p>
<p>१३७ जना पुर्पक्षका लागि कारागारमा र ८८ जना अनुसन्धानका क्रममा प्रहरी हिरासतमा छन्। </p>
<p>केन्द्रीयस्तरका नेताहरू पक्राउ पर्न थालेपछि महासचिव चन्दले स्थायी समिति र पोलिटब्यूरो नै भंग गरेका छन्।</p>
<p>त्यसको ठाउँमा पाँच सदस्यीय सचिवालय र ३५ सदस्यीय केन्द्रीय समिति गठन गरिएको छ। </p>
<p>प्रतिबन्धपछिको ८ महीनाको घटना र तथ्यांकसहित आजको कान्तिपुर दैनिकले समाचार छापेको छ। </p>
प्रतिक्रिया दिनुहोस्
.jpg)
