प्रचण्ड-नेपाल समूहको अल्टिमेटम सकिने बेला बालुवाटार र खुमलटारमा छलफल तीव्र
<p>काठमाडाैं। नेपाल कम्युनिष्ट पार्टी (नेकपा)का कार्यकारी अध्यक्ष पुष्पकमल दाहाल प्रचण्ड र वरिष्ठ नेता माधवकुमार नेपाल समूहले सचिवालय बैठक बोलाउन दिएको ४८ घन्टाको अल्टिमेटम सकिएको छ।</p>
<p>गत कात्तिक २२ गते प्रधानमन्त्री तथा पार्टी अध्यक्ष केपी शर्मा ओलीलाई सरकारी निवास बालुवाटारमा सामूहिक भेटघाट गरी ४८ घण्टे अल्टिमेटम दिएका थिए, जुन आज सकिएको हो।</p>
<p>“प्रधानमन्त्रीलाई बैठक बोलाउन दिएको अल्टिमेटम सकिएको छ तर प्रधानमन्त्रीज्यूले बैठक अझै बोलाउनु भएको छैन्,” प्रचण्ड निकट एक नेताले भने, “तर, आज महासचिवज्यूलाई पठाएर बैठकको तयारीमा लागेको जानकारी भने गराउनु भएको छ।”</p>
<p>उनका अनुसार बैठकमा छलफल गर्ने अजेन्डाका बारेमा कार्यकारी अध्यक्ष प्रचण्ड र महासचिव पौडेलका बीचमा छलफल भए पनि टुंगो भने लागिसकेको छैन।</p>
<p>प्रधानमन्त्री ओलीले महासचिव पौडेललाई बैठकको अजेन्डा तय गर्न प्रचण्ड निवास खुमलटारमा पठाए पनि उता प्रधानमन्त्री ओलीले भने यसअघि निर्माण भएको समस्या समाधान सुझाव कार्यदलका प्रतिनिधिलाई बालुवाटारमा सामूहिक भेटघाट गरिरहेका छन्।</p>
<p>कार्यदलका सदस्य सुरेन्द्र पाण्डेले पुनः कार्यदलको सदस्यबीच भेटघाट आवाश्यक भएको भन्दै प्रधानमन्त्री ओलीसँग समय माग गरेपछि सोमबार बालुवाटारमा सामूहिक भेटघाट भएको हो।</p>
<p>प्रधानमन्त्री ओलीले अजेन्डा तय नगरी बैठक बोलाउन आवश्यक नभएको तर्क गरिरहेका छन् भने ओलीइतर नेताले बैठकमा समसामायिक विषयमा छलफल गर्नका लागि भन्दै लिखित माग गरिरहेको बेला खुमलटार र बालुवाटारमा भेटघाट तीव्र भएको हो।</p>
<p>गत कात्तिक २२ गते नेकपाका सचिवालयका बहुमत सदस्य कार्यकारी अध्यक्ष प्रचण्ड, वरिष्ठ नेताद्वय झलनाथ खनाल र नेपाल, उपाध्यक्ष वामदेव गौतम र प्रवक्ता नारायणकाजी श्रेष्ठले सचिवालय बैठक बोलाउन लिखितरूपमा नै माग गरेका थिए।</p>
<p>सचिवालय सदस्यले लिखितरूपमा बैठक बोलाउन माग गरेको नेकपामा यो पहिलो घटना हो।</p>
प्रतिक्रिया दिनुहोस्
.jpg)
