Politics

गृहपृष्ठ

कम्युनिस्ट आन्दोलनमा ओलीको आगमन दुर्भाग्यपूर्ण : माधवकुमार नेपाल काठमाडौं । नेपाल कम्युनिस्ट पार्टी (नेकपा)को मूलधार छोडेर दुइमध्येका एक अध्यक्ष पुष्पकमल दाहाल प्रचण्ड समूहमा लागेका वरिष्ठ नेता माधवकुमार नेपालले प्रधानमन्त्री केपी ओली कम्युनिस्ट आन्दोलनमा छिर्नु दुर्भाग्य भएको बताएका छन् । प्रचण्ड समूहका अध्यक्ष घोषित नेता नेपालले आज काठमाडौंमा आयोजित आमसभालाई सम्बोधन गर्दै पार्टीका प्रथम अध्यक्ष ओलीले आफूलाई विधानभन्दा माथि सर्वेसर्वा ठानेको आरोप लगाए । प्रधानमन्त्री ओलीले कहिल्यै पनि नियमकानुनको पालना नगरेको आरोप लगाउँदै नेता नेपालले भने, “वास्तवमा दूर्भाग्य भनौं यस्ता मान्छे कम्युनिस्ट आन्दोलनमा छिरेछन्, पार्टीमा छिरेछन् । मसँगसँगै झण्डै ५० वर्षदेखि काम गरेका मान्छे । जहिल्यै पनि हैरान मात्र गर्ने, जहिल्यै पनि दुःख मात्र दिने । मैले थुम्थुम्याउने, मैले फकाउने मैले मिलाउने ।” पार्टी एकतापछि कार्यकारी अध्यक्ष प्रचण्डले पनि मिलेर जान धेरै प्रयास गरेको, तर ओलीले नमानेको नेता नेपालको आरोप थियो ।  “जहिल्यै पनि बिहान बोलाएको छ, बालुवाटार हाजिरी गर्न जाने । बेलुका बोलाएको छ, बालुवाटार हाजिरी गर्न जाने । राति १० बजे बोलाएको छ, बालुवाटार जाने । हामीलाई दिक्क लाग्थ्यो । तर मिलाऔँ, सम्झाऔँ, मिलेरै जाऔँ भनेर कमरेड प्रचण्डले धेरै कोशिस गर्नुभयो,” नेता नेपालले भने, “तर उहाँको आदेश पालन नगरेसम्म नमान्ने । उहाँ आदेश पालन गर्न लगाउने । आदेश पालन नगर्दा उहाँले पार्टी सिस्टम जम्मै भत्काउने काम गर्ने चरित्रको मान्छे हुनुहुँदो रहेछ ।”