लोकतन्त्र र कांग्रेस सङ्कटमा छ : वरिष्ठ नेता पौडेल
<p>गलकोट। नेपाली कांग्रेसका वरिष्ठ नेता रामचन्द्र पौडेलले लोकतन्त्र र कांग्रेस सङ्‍कटमा रहेको बताएका छन्। बागलुङमा नेपाल शिक्षक सङ्‍घले आज आयोजना गरेको गण्डकी प्रदेशस्तरीय दोस्रो र तेस्रो प्रतिनिधिसभालाई सम्बोधन गर्दै उनले कांग्रेस आन्तरिक किचलोमा फसेको बताउँदै सबै मिलेर पार्टीलाई जनताको पहिलो बनाउनुपर्ने बताए। </p>
<p>“लोकतन्त्र र कांग्रेस सङ्‍कटमा छ, जसकारण नेपाल नै सङ्‍कटमा धकेलिन थाल्यो,” पौडेलले भने, “कांग्रेसले समीक्षा गर्ने बेला आएको छ, देश जोगाउन पहिला कांग्रेस सच्चिन आवश्यक रहेको छ।” उनले पार्टी सभापति शेरबहादुर देउवाप्रति लक्षित गर्दै कांग्रेस कसका कारण सकिँदै छ भन्‍ने कुरा छर्लङ्‍ग भएको बताए।</p>
<p>कम्युनिस्ट फुटेर चिराचिरा पर्दासमेत कांग्रेसप्रति जनता आउन नसक्नुका पछाडि कांग्रेसको नेतृत्व नै कमजोरी रहेको भन्दै अब सच्चिएर जानुपर्ने बताउँदै कांग्रेसको उपचार माथिबाट नभएर तलबाटै गर्न आवश्यक रहेको उल्लेख गरे।</p>
<p>“अब माथिबाट कांग्रेस सुध्रिन्‍नजस्तो छ,” पौडेलले भने, “जनस्तरबाटै उपचार विधि खोजौँ।” उनले राष्ट्रको सङ्‍कट बचाउन कांग्रेस सक्षम भए पनि आन्तरिक किचलो अन्त्य गर्न आवश्यक रहेको बताए। उनले देशको हित हुन्छ भने देउवाको नेतृत्वमा कांग्रेस सरकारमा जान तयार रहेको बताए।</p>
<p>शिक्षकले विद्यार्थीलाई संविधान पढाउन सक्नुपर्ने भन्दै संविधान पढाएपछि कांग्रेसमा आउ भन्‍नै नपर्ने उनको तर्क छ। यसो भन्दैमा विद्यालयलाई राजनीति गर्ने थलो नगराउन नेता पौडेललेको भनाइ छ। <em>रासस</em></p>
प्रतिक्रिया दिनुहोस्
.jpg)
