दक्षिण एसियाली आर्चरी महासंघको अध्यक्षमा गुरुङ
<p>काठमाडौं। दक्षिण एसियाली आर्चरी महासंघ (साफ) को अध्यक्षमा दीपकराज गुरुङ चयन भएका छन्।</p>
<p>बंगलादेशमा गत हप्ता बसेको महासंघको बोर्ड बैठकले गुरुङलाई चार वर्षे कार्षयकालको लागि अध्यक्ष बनाएको छ। महासंघले बुधबार विज्ञप्ति निकाल्दै गुरुङलाई अध्यक्षको जिम्मेवारी दिइएको उल्लेख गरेको छ।</p>
<p>साफको संस्थापक सदस्य रहेका गुरुङ महासंघमा यसअघि वरिष्ठ उपाध्यक्ष थिए। ९ अक्टुबरमा अध्यक्ष चयन भएका गुरुङको कार्यकाल ८ अक्टुबर २०२३ सम्म रहनेछ।</p>
<p>साफका महासचिव एवं विश्व आर्चरी एसियाका प्रथम उपाध्यक्ष तथा बंगलादेश ओलम्पिक कमिटीका कोषाध्यक्ष काजी राजीव उद्दिन एहमेद चपोलले गुरुङको नेतृत्व र निर्देशनमा दक्षिण एसियाली आर्चरीको रणनीति र गतिविधिको विकास हुने विश्वास व्यक्त गरेका छन्।</p>
<p>आफ्नो लागि अध्यक्षको पद अवसर र चुनौती दुवै भएको बताउँदै अध्यक्ष गुरुङले <em>देखापढी</em>सँग भने, “आर्चरीमा हामीले राष्ट्रिय मात्र नभई क्षेत्रीय स्तरमा गरेको कामको पनि मूल्यांकन भएको जस्तो लाग्छ, यसमा म मात्र नभएर मेरो साथीहरु सबैको साथ छ।”</p>
<p>नेपालमा दक्षिण एसियाली आर्चरी च्याम्पियनसिप हुन नसकिरहेको बेला अब नेपालमा ल्याउन पहल गर्ने उनको भनाइ छ। २०२० को ओलम्पिकको लागि नेपाली खेलाडीलाई क्वालिफाइङ राउण्डमा समावेश गर्ने गुरुङले बताएका छन्।</p>
<p>"साफको पाँचौ संस्करण नेपालमा गर्नेछौं, २०२४ मा एसियाली च्याम्पियनसिप पनि नेपालमै आयोजना गर्ने लक्ष्य छ। यसको लागि साथीहरुसँग कुरा पनि गरिसकेको छु।” गुरुङले भने।</p>
<p>गुरुङले नेपाली खेलाडीहरुलाई अझ बलियो बनाएर अगाडि बढाउने बताएका छन्। सन् २००४ मा स्थापनाको छोटो समयमै नेपाली आर्चरीले २०१६ को रियो ओलम्पिक खेलेको थियो।</p>
<p>अब ओलम्पिक खेल्न झन् चुनौती बढेको बताउँदै अध्यक्ष गुरुङले २०२४ मा छनोट भएर पेरिसमा हुने ओलम्पिकमा पदक हासिल गर्ने चुनौतीका साथ तयारी गर्ने संकल्प गरे। </p>
प्रतिक्रिया दिनुहोस्
.jpg)
