क्यान बैठक: चारवटा समिति गठन, पारसकाे राजीनामाबारे निर्णय भएन
<p>काठमाडौं। नेपाल क्रिकेट संघ (क्यान) आईसीसीबाट निलम्बन फुकुवा भएपछि आज बसेको पहिलो कार्यसमिति बैठकले विभिन्न निर्णयहरू गरेको छ।</p>
<p>मूलपानीस्थित क्यानको केन्द्रीय कार्यलयमा बसेको बैठकले चारवटा समिति गठन गर्नेलगायत निर्णय गरेको क्यान सचिव अशोकनाथ प्याकुरेलले जानकारी दिए।</p>
<p>बैठकले प्राविधिक, आर्थिक, प्रतियोगिता र मिडिया कमिटी गठन गर्ने निर्णय गरेकाे छ।</p>
<p>प्राविधिक समितिमा संजयराज सिंह, आर्थिक समितिमा कोषाध्यक्ष रोशन सिंह, प्रतियोगिता समितिमा प्रशान्त मल्ल र मिडिया समितिमा सचिव अशोक प्याकुरेललाई चयन गरिएकाे छ।</p>
<p>सचिव प्याकुरेललाई प्रवक्ताको समेत जिम्मेवारी दिइएको छ।</p>
<p>यस्तै निलम्बन फुकुवा भएकोमा आईसीसी, नेपाल सरकार,राष्ट्रिय खेलकुद परिषद्, सल्लाहकार समिति, स्वतन्त्र कमिटी र सम्पूर्ण स्टेक होल्डरलाई धन्यवाद ज्ञापन गरेको सचिव प्याकुरेलकाे भनाइ छ।</p>
<p>यस्तै अहिलेको जल्दोबल्दो विषय राष्ट्रिय क्रिकेट टीमका कप्तान पारस खड्काको राजीनामाको विषयमा भने कुनै निर्णय हुन सकेन।</p>
<p>त्यसबारेमा बैठकमा ध्यानाकर्षण भएको छ। तर, आधिकारिकरूपमा केही नआएकोले अहिले निर्णय नगरेकाे प्याकुरेलकाे भनाइ छ। तथ्य बुझेर छलफल अगाडि बढाइने उनले बताए।</p>
<p>यस्तै आईसीसी प्रतिनिधिले चाँडै नेपालमा भ्रमण गर्ने उनले जानकारी दिए।</p>
प्रतिक्रिया दिनुहोस्
.jpg)
