साफ यू-१८ च्याम्पियनसिप : भुटानको चार गोलमा अडेको नेपालको भाग्य
<p>काठमाडौं। तेस्रो संस्करणको साफ यू-१८ च्याम्पियनसिप अन्तर्गत आज समूह ए को अन्तिम खेलमा भुटान र माल्दिभ्स भिड्दै छन्।</p>
<p>हलचोकस्थित एपीएफ मैदानमा हुने यी दुई टिमबीचको खेलको चासो कसैलाई छ भने त्यो नेपाललाई छ। नेपालले भुटान र माल्दिभ्ससँग खेलिसकेको छ।</p>
<p>च्याम्पियनसिपअघि सहजै सेमिफाइनल पुग्ने लक्ष्य राखेको नेपाल अहिले समूह चरणबाटै बाहिरिने खतरामा छ। माल्दिभ्ससँग १-१ को बराबरी र भुटानसँगको ३-० को हारपछि नेपालको १ अंक मात्र छ । </p>
<p>भुटान भने एक खेल जित्दै सेमिफाइनल पुगिसकेको छ। त्यसैले समूह ए बाट सेमिफाइनल पुग्ने दोस्रो टिमको टुङ्गो आज लाग्नेछ।</p>
<p>माल्दिभ्स भुटानलाई पारजित गरे वा बराबरी खेले पनि सेमिफाइनल पुग्नेछ । यस्तो नतिजा आए नेपाल घरेलु मैदानमै भएको च्याम्पियनसिपबाट बाहिरिनेछ। नेपालको भाग्य अब भुटानको हातमा छ। यदी भुटानले माल्दिभ्सलाई ४-० अन्तरले पराजित गरेमा मात्र नेपाल समूह उपविजेता बन्दै सेमिफाइनल पुग्नेछ। </p>
<p>नेपालको सम्भावना अझै बाँकी रहेपनि यो सजिलो भने छैन। भुटानले त्यो भन्दा थोरै गोलअन्तरमा पराजित गरेमा भने नेपाल बाहिरिनेछ।</p>
<p>सन् २०१५ मा नेपालबाट शुरु भएको यो च्याम्पियनसिप नेपालले दुई पटक जितेको थियो। घरेलु मैदानमा उपाधि जित्दै उपाधिमा ह्याट्रिक गर्ने लक्ष्य बनाएको नेपाललाई शुरुमै धक्‍का लागेको हो।</p>
<p>माल्दिभ्स र भुटानबीच आजको खेल दिउँसो ३ बजे शुरु हुनेछ।<br />
</p>
प्रतिक्रिया दिनुहोस्
.jpg)
