टी २० विश्वकप: ग्लोबल क्वालिफायरको ट्रफी सार्वजनिक
<p>काठमाडौं। सन् २०२० मा अष्ट्रेलियामा आयोजना हुने टी-२० विश्वकप क्रिकेटको लागि युएईमा हुने ग्लोबल क्‍वालिफायरको विजेताले पाउने ट्रफी सार्वजनिक भएको छ। यस पटक नेपाल भने क्‍वालिफायरमा सहभागी छैन।</p>
<p>अन्तर्राष्ट्रिय क्रिकेट परिषद् (आईसीसी) ले २४ असोज राति युएईको अबुधाबीमा ट्रफी सार्वजनिक गरेको हो।</p>
<p>१८ अक्टुबरदेखि ३ नोभेम्वरसम्म हुने क्‍वालिफायरमा प्रतिस्पर्धा गर्ने १४ देशका कप्तान ट्रफी सार्वजनिक कार्यक्रममा उपस्थिति थिए।</p>
<p>यस क्‍वालिफायरबाट शीर्ष ६ राष्ट्रले अष्ट्रलियाको टिकट काट्नेछ। तर, गत जुलाईमा सिंगापुरमा भएको एसियन रिजनल फाइनल क्‍वालिफायरमा तेस्रो भएपछि नेपाल ग्लोबल क्वालिफायरमा छनोट भएन। </p>
<p>राउण्ड रोबिनको आधारमा हुने क्‍वालिफायरमा स्कटल्याण्ड, नेदरल्याण्ड्स, पपुवा न्युगिनी, सिंगापुर, नामिबिया, केन्या, बर्मुडा, युएई, आयरल्याण्ड, ओमन, हङकङ, क्यानडा, जर्सी र नाइजेरिया छन्।</p>
<p>छनोटको उद्घाटन खेल १८ अक्टोबरमा स्कटल्याण्ड र सिंगापुरबीच दुबईस्थित आइसीसी एकेडेमी मैदानमा हुनेछ।</p>
प्रतिक्रिया दिनुहोस्
.jpg)
